Almatıda TDT ölkələri nəqliyyat nazirlərinin VIII iclası keçirilib
“New Silk Way” 7-ci Beynəlxalq Nəqliyyat və Logistika Biznes Forumu çərçivəsində Qazaxıstanın Almatı şəhərində Türk Dövlətləri Təşkilatına (TDT) üzv ölkələrin nəqliyyat nazirlərinin VIII iclası keçirilib.
AZƏRTAC-ın Qazaxıstan Nəqliyyat Nazirliyinin mətbuat xidmətinə istinadla verdiyi xəbərə görə, tədbirdə TDT Baş katibi və Azərbaycan, Qazaxıstan, Qırğızıstan, Türkiyə, Özbəkistanın nəqliyyat qurumlarının rəhbərləri iştirak ediblər.
İclasda iştirakçı ölkələr arasında nəqliyyat əməkdaşlığının inkişafı ilə bağlı əsas məsələlər müzakirə olunub. Görüşün yekununda tərəflərin nəqliyyat əməkdaşlığının gələcək inkişafına dair razılaşmalarını əks etdirən yekun Kommünike imzalanıb.
İclasda Trans-Xəzər Beynəlxalq Nəqliyyat Marşrutunun (Orta Dəhliz – red.) inkişafına, rəqəmsal texnologiyaların və elektron tranzit prosedurlarının həyata keçirilməsinə xüsusi diqqət yetirilib. Dəniz nəqliyyatını daha da inkişaf etdirmək üçün Xəzər dənizində gəmiçiliyin artırılması, daşınma obyektlərinin tikintisi və bərə xidmətlərinin işə salınması təşəbbüslərinə dəstək verilib. Bu məqsədlə TDT ölkələrinin profil təşkilatlarının iştirakı ilə ekspertlərin görüşünün keçirilməsi planlaşdırılır.
Bakı-Tbilisi-Qars marşrutu da daxil olmaqla müntəzəm blok qatarlarının təşkili istiqamətində dəmir yolu administrasiyalarının səylərinə dəstək də təsdiq edilib. Tərəflər nəqliyyat proseslərini rəqəmsallaşdıracaq. Elektron sistemlərin (e-İcazə, e-TIR, e-CMR) tətbiqinin sürətləndirilməsinə dair razılıq əldə olunub. İştirakçı ölkələr arasında uğurlu sınaq layihələri də qeyd olunub. Məsələn, xarici icazə blanklarının ölkələr arasında mübadiləsi prosesi tamamilə elektron formata keçəcək.
İştirakçılar onu da qeyd ediblər ki, əldə olunmuş razılaşmalar regional əlaqələrin möhkəmləndirilməsi, ticarətin inkişafı, dövlətlər arasında iqtisadi əlaqələrin gücləndirilməsi üçün yeni perspektivlər yaradır.
TDT ölkələri nəqliyyat nazirlərinin növbəti, IX iclası 2026-cı ildə Qırğızıstanda keçiriləcək.
Müəllif haqqında
