LivePress Media xəbər verir ki, bu gün Bərdə rayonunda Novruz bayramı münasibətilə bayram tədbiri keçirilib.
Novruzun gəlişini əks etdirən al-əlvan plakatlarla bəzədilmiş Heydər Əliyev adına park-bulvarda keçirilən tədbirdə rayon İcra Hakimiyyətinin başçısı Vidadi İsayev başda olmaqla rayon İcra Hakimiyyətinin, YAP rayon təşkilatının, hüquq-mühafizə orqanlarının rəhbər işçiləri, idarə, müəssisə və təşkilatların kollektivləri, şəhid ailələri, qazilər və rayon sakinləri iştirak ediblər.
Rayon İcra Hakimiyyətinin başçısı Vidadi İsayev və rayonun rəhbər şəxsləri bayram münasibətilə ümumtəhsil və musiqi məktəblərinin, eləcə də məktəbəqədər və məktəbdənkənar müəssisələrin kollektivlərinin hazırladığı Novruz atributlarından ibarət sərgilərə baxış keçirib, gənc idmançıların çıxışlarını izləyib, məktəblilərin təqdim etdiyi bədii kompozisiyalar və milli məişət, milli mətbəx nümunələrini əks etdirən səhnələrlə tanış olublar. Tədbir çərçivəsində torpaqlarımızın azadlığı uğrunda canlarını fəda etmiş şəhidlərimizin və Ümummilli lider Heydər Əliyevin əziz xatirəsi dərin ehtiramla yad edilib.
Daha sonra rayon İcra Hakimiyyətinin başçısı Vidadi İsayev tədbir iştirakçılarını Novruz bayramı münasibətilə təbrik edərək öz xoş arzularını çatdırıb. Bayram şənliyində Novruzun rəmzi qəhrəmanları olan Bahar qızı, Kosa və Keçəl rəngarəng çıxışları ilə iştirakçılara xoş ovqat bəxş edib, tədbirə xüsusi rəng qatıblar. Rayon İcra Hakimiyyətinin başçısı Vidadi İsayev tərəfindən bayram tonqalı alovlandırılıb və tonqalın ətrafında toplaşan insanlar tərəfindən bu an böyük sevinc və coşqu ilə qarşılanıb. Şənlik rayon Mədəniyyət Mərkəzinin təqdim etdiyi zəngin konsert proqramı ilə davam etdirilib.
Müəllif haqqında
