Belarus Baş nazirinin müavini: 2025-ci ildə Azərbaycanda 200 liftin modernləşdirilməsi həyata keçirilib
Azərbaycan və Belarus prezidentlərinin həyata keçirdikləri uğurlu siyasətin nəticəsində bu gün dövlətlərimiz arasındakı əlaqələr bütün sahələr üzrə yüksələn xətlə inkişaf edir.
AZƏRTAC xəbər verir ki, bu sözləri Belarusun Baş nazirinin müavini Natalya Petkeviç Bakıda keçirilən Azərbaycan-Belarus iqtisadi əməkdaşlıq üzrə Birgə Hökumətlərarası Komissiyanın 15-ci iclasında çıxışı zamanı deyib.
O bildirib ki, 2004-cü ildən fəaliyyət göstərən hökumətlərarası komissiya dövlətlərimiz arasında iqtisadi, ticarət, nəqliyyat, mədəniyyət, idman və digər sahələrdə əlaqələrin inkişafına böyük təkan verib.
“Komissiyanın fəaliyyətində ötən dövr ərzində uğurlu nəticələr əldə edilib. Bu gün 2024–2025-ci illəri əhatə edən əməkdaşlıq üzrə Yol Xəritəsinin icrası ilə bağlı müzakirələr aparılacaq. Sənaye, kənd təsərrüfatı, maşınqayırma, şəhər təsərrüfatı, əczaçılıq, peşə təhsili, nəqliyyat-logistika, ticarət və investisiya sahələrində konkret nəticələr və irəliləyişlər var. Gəncə Avtomobil Zavodunda Belarus tərəfi ilə birlikdə kənd təsərrüfatı və xüsusi təyinatlı texnikanın yığılması davam edir. Bununla yanaşı, Belarusla lift istehsalı və təchizatı sahəsində uzunmüddətli əməkdaşlıq çərçivəsində Azərbaycanda “Moqilyovliftmaş” ilə lokal istehsalın genişləndirilməsi üzrə də işlər davam etdirilir və 2025-ci ildə 200 liftin modernləşdirilməsi, quraşdırılması həyata keçirilib. Belarusun tikinti şirkətləri Azərbaycanın işğaldan azad olunan ərazilərində aparılan genişmiqyaslı tikinti və quruculuq işlərində iştirak etməkdə maraqlıdır. Həmin ərazilərdə birgə tikinti materialları istehsalı müəssisələrinin açılması qarşılıqlı əlaqələrimizin inkişafına böyük təkan verə bilər”, – deyə Natalya Petkeviç nəzərə çatdırıb.
Müəllif haqqında
