“Bu torpaqların sahibləri bizik…”
Qarabağın xilaskarı İlham Əliyev doğma yurdlarına qayıdan keçmiş məcburi köçkünlərin sevinclərini onlarla birlikdə yaşayır
Şanlı Zəfərimizin beşinci ildönümünü qürurla qeyd etdiyimiz bu günlərdə qalib lider İlham Əliyevin işğaldan azad edilən torpaqlarımıza – Cəbrayıla, Zəngilana səfər etməsi, yurdlarına qovuşdurulan keçmiş məcburi köçkünlərə yeni evlərinin açarlarını öz əlləri ilə təqdim etməsi, vətən həsrətinə son qoyulan bu insanların qayıdış sevinclərini bölüşməsi tarix salnamələrimizin gələcəkdə də fəxrlə vərəqlənəcək parlaq səhifələri oldu. Ümumiyyətlə, son beş il ərzində müzəffər sərkərdə İlham Əliyevin xilas etdiyi Qarabağ və Şərqi Zəngəzura səfərlərinin hər biri rəmzi mənası, daşıdığı tarixi ismarışlarla yaddaşlarda silinməz izlərlə həkk olunub.
Yurdda dirçəliş zəfəri
2020-ci ilin noyabrında azad edilən torpaqlarımıza yollanaraq qələbə simvolumuz Şuşaya uzanan Zəfər yolunun təməlini qoyan Qarabağın baş memarı İlham Əliyevin tarixi yurdlarımıza mütəmadi səfərləri bu torpaqların əzəli sahiblərinin qayıtdığının dünyaya qürurlu bəyanını özündə əks etdirir. Bu onu göstərir ki, zirvələrində üçrəngli ay-ulduzlu Azərbaycan bayrağının əbədi dalğalandığı Qarabağda və Şərqi Zəngəzurda artıq həyat qaynayır, ata-baba yurdlarının sakinlərinin qəlbində indi vətən həsrəti qövr etmir, ana torpağa qovuşmağın xoşbəxtliyi yaşanır. O da gerçəklikdir ki, düz birqərinəlik zaman dilimində məcburi köçkünlüyün maddi-mənəvi çətinliklərinə sinə gərən bu insanlar bir an da olsa, doğma torpaqlarına dönəcəklərinə olan ümidlərini itirmədilər. Bu inamı onlara Prezident İlham Əliyevin xalqımızın milli maraqlarının təmini uğrunda həyata keçirdiyi qətiyyətli siyasət aşılamışdı. Ölkəmizə rəhbərlik etdiyi ilk gündən dövlətimizin başçısı İlham Əliyev işğal altında olan ərazilərimizin azadlığını özünün prioritet vəzifəsi hesab etdi. Ötən illər ərzində diqqəti, qayğısı ilə daim keçmiş məcburi köçkünlərimizin yanında olan dövlətimizin başçısı el-obasından didərgin salınmış vətəndaşlarımızla olan bütün görüşlərində onlara öz torpaqlarına qayıdacaqlarını qətiyyətlə söyləyirdi.
İndi xalqımız həmin tarixi günlərə şahidlik edir, Qarabağ və Şərqi Zəngəzura ardıcıl olaraq qayıdış karvanları yola salınır.
Bu il oktyabrın 28-də işğaldan azad edilən yaşayış məntəqələrimizdən daha bir neçəsində dirçəliş təntənəsi yaşandı. Həmin tarixdə Prezident İlham Əliyev Cəbrayıl rayonunun Horovlu kəndinin birinci mərhələsinin açılışında iştirak etdi, rayonun Şahvəlli kəndində “Şəms” və “Üfüq” Günəş-Elektrik stansiyalarının təməlini qoydu, “Şəfəq” Günəş-Elektrik Stansiyasına gedən avtomobil yolunu açdı. Həmçinin Cəbrayıl şəhərində ikinci və üçüncü yaşayış komplekslərinin, Cəbrayıl şəhər məscidinin təməlini qoydu. Zəngilan rayonunun Ağalı kəndinin 2-ci mərhələsinin və Məmmədbəyli kəndinin açılışlarında iştirak edən Prezident İlham Əliyev Zəngilan şəhərində 104 mənzilli yaşayış kompleksində görülmüş işlərlə tanış oldu.
Gözəl həyat qururuq
Həmin tarixdə ölkəmizin rəhbəri Zəngilan rayonunun Məmmədbəyli və Ağalı, eləcə də Cəbrayıl rayonunun Horovlu kəndinin sakinlərini yurda qayıdış münasibətilə təbrik edib onlara mənzillərinin açarlarını verdi.
“İşğal dövründə ovaxtkı köçkünlərlə çoxsaylı görüşlərimdə mən demişdim ki, torpaqlar işğaldan azad olunandan sonra şəhərlərimiz, kəndlərimiz yenidən qurulacaq, əvvəlkindən daha gözəl olacaq. Bugünkü gün bu sözlərin əyani sübutudur”, – deyə, Cəbrayıl rayonunun Horovlu kəndində sakinlərlə görüşü zamanı Prezident İlham Əliyev söylədi.
Ötən üç onillik boyu xalqımız adına yaşanan həssas və fəxarətli məqamlara bir daha vurğu edən dövlətimizin başçısı dedi ki, bu gün sizin həyatınızda yeni dövr başlayır: “Siz uzun illər – 30 il ərzində ağır şəraitdə köçkün, qaçqın həyatını yaşamısınız, mənəvi əzablar çəkmisiniz. Xüsusilə işğalın ilk mərhələsində köçkünlərin mütləq əksəriyyəti çadır şəhərciklərində yerləşmişdir. Ona görə bugünkü reallıq, bugünkü gün, o cümlədən ədalətin təntənəsidir. Ədalətə inanmaq və onu təmin etmək lazımdır. Bax bizim xalqımız həm ədalətə inanıb, həm də onu təmin edib. Bu torpaqların sahibləri bizik. Düşməni öz torpaqlarımızdan qovmuşuq və bu gün gözəl həyat qururuq”.
Qayıdış köçləri ilə el-obalarına dönən keçmiş məcburi köçkünlərlə doğma evlərində görüşmək, onlarla söhbət etmək, yurd sevinclərini bölüşmək Prezident İlham Əliyevin adətinə çevrilib. 28 oktyabrda Cəbrayılın Horovlu, eləcə də Zəngilanın Ağalı və Məmmədbəyli kəndlərinin sakinləri ilə görüşün timsalında bu xoş ənənə bir daha təkrarlandı. Həm sevincli, həm də duyğulu anlar yaşanan bu görüşlər, edilən söhbətlər keçmiş məcburi köçkünlərin onları yurda qovuşduran Prezident İlham Əliyevə minnətdarlıqları ilə müşayiət olundu.
Dövlət başçısının doğma ocaqlarına dönən keçmiş məcburi köçkünləri daim diqqətdə saxlaması, evlərinin qonağı olması, onlarla səmimi söhbət etməsi bu vətəndaşlarımızın sevinclərini daha da artırır. Horovlu sakinləri də bu diqqət və qayğıdan doğan minnətdarlıq hisslərini Prezidentlə görüş zamanı səmimi şəkildə izhar etdilər: “…Sizin sayənizdə hər bir yerdə bizim şəraitimiz yaxşıdır. Allah Sizə cansağlığı versin. Mehriban xanıma da buradan səmimi salamlarımızı, çox-çox istəklərimizi bildiririk”.
Horovlu kənd sakini ilə dövlətimizin başçısı İlham Əliyev arasında keçən dialoq həm də işğaldan azad edilən ərazilərdə dövlətimiz tərəfindən aparılan dünyamiqyaslı quruculuq işlərini bir daha gözlər önünə sərdi.
Kişi sakin: Biz bu gün kəndimizə gələndə həqiqətən də kəndimizi tanıya bilmədik. Sanki İsveçrədir, çox möhtəşəmdir, həddindən artıq möhtəşəmdir.
Prezident İlham Əliyev: Azərbaycan standartları belədir.
Kişi sakin: Bəli, təbii ki, Sizin sayənizdə, cənab Prezident. Biz həqiqətən də inana bilmədik. Yəni bir kənddə bu qədər şərait, bu qədər gözəlliklər. Allah Sizdən razı olsun. Təşəkkür edirik, bu gün bizim sevincimizə sevinc qatdınız. Gəldiniz, bizimlə görüşdünüz, köçməyimiz münasibətilə bizi təbrik etdiniz. Çox sağ olun, Allah Sizdən razı olsun.
Görüş zamanı dövlət başçısı onu da vurğuladı ki, indi gənclər də darıxmamalıdır burada: “Çünki birincisi, doğma torpaqdır. İkincisi, şərait yaxşıdır. Üçüncüsü, bütün bu Qarabağ, Şərqi Zəngəzur ən inkişaf etmiş bölgələrdən biri olacaq – nəinki Azərbaycanda, dünya miqyasında. Belə kəndlər harada salınır?”
Abadlıq-quruculuq, xoşbəxt həyat və sülh ünvanı
Oktyabrın 28-də dövlətimizin rəhbərinin Zəngilan rayonunun Məmmədbəyli və Ağalı kəndlərinin sakinləri ilə görüşü də yaddaqalan tarixə çevrildi.
“Xoş gəlmisiniz doğma vətəninizə”, – deyə, dədə-baba torpaqlarında keçmiş məcburi köçkünləri salamlayan Prezident İlham Əliyev söylədi ki, bu gün Böyük qayıdışın növbəti mərhələsidir: “Bilirsiniz ki, biz “Böyük qayıdış” proqramının başlanğıcını da Zəngilan rayonunda qoyduq. Birinci kənd – Ağalı kəndində artıq üç il yarımdır ki, insanlar yaşayır və çox gözəl şərait yaradılmışdır və gözəl də saxlanılır”.
Vətən müharibəsindən dərhal sonra işğaldan azad edilən ərazilərdə genişmiqyaslı quruculuq və bərpa işlərinə başlanılıb. Zəngilan rayonu da yenidən qurulur. Bununla bağlı dövlətimizin rəhbəri söylədi ki, bu bölgənin çox gözəl gələcəyi olacaq: “Necə ki, bütün Qarabağın, Şərqi Zəngəzurun gələcəyi çox parlaq olacaq. Bugünkü reallıq – qurduğumuz şəhərlər və kəndlər bunu göstərir”.
Düşmən düz 30 il boyu işğal etdiyi ərazilərimizdə “yandırılmış torpaq” siyasəti həyata keçirərək bu yerlərdə həyatı “öldürməyə” çalışdı. Ancaq bu gün yenidən yaşıllaşan, meşələri pöhrələyən Qarabağ və Şərqi Zəngəzur düşmənə gözdağıdır. Ağalı və Məmmədbəyli kəndlərinin sakinləri ilə görüşündə ölkəmizin liderinin “Mən indi Ağalının içi ilə keçdim və yeni binalarla tanış olarkən gördüm ki, bütün həyətyanı sahələr sanki gözəl bir bağa çevrilib”, – deməsi də bu mənada təsadüfi xarakter daşımırdı.
1990-cı illərin əvvəllərində yurdlarından didərgin salınmış, müsibətlərə tuş gəlmiş, çadırlarda, vaqonlarda, yataqxanalarda maddi-mənəvi məhrumiyyətlərlə yaşamış keçmiş məcburi köçkünlər artıq əbədi bəxtəvər günlərinə qədəm qoyublar. Qalib lider İlham Əliyevin vurğuladığı kimi, bu gün Qarabağ və Şərqi Zəngəzur abadlıq-quruculuq, xoşbəxt həyat və sülh ünvanıdır.
Yasəmən MUSAYEVA,
“Azərbaycan”
Müəllif haqqında
