Londonda Böyük Britaniya-Azərbaycan parlamentlərarası dostluq qrupunun iclası keçirilib
Azərbaycan-Böyük Britaniya və Şimali İrlandiya Birləşmiş Krallığı parlamentlərarası əlaqələr üzrə işçi qrupunun fəaliyyəti bərpa olunub.
Bu barədə AZƏRTAC-a açıqlamasında Milli Məclisin deputatı, Azərbaycan–Böyük Britaniya parlamentlərarası əlaqələr üzrə işçi qrupunun rəhbəri Fariz İsmayılzadə bildirib.
Deputat qeyd edib ki, səfər çərçivəsində Londonda Böyük Britaniya–Azərbaycan parlamentlərarası dostluq qrupunun iclası keçirilib.
“Uzun fasilədən sonra Böyük Britaniya–Azərbaycan parlamentlərarası dostluq qrupu yenidən fəaliyyətə başlayıb. Bu, həm Azərbaycan səfirliyinin, həm də parlamentimizin məqsədyönlü təbliğat və diplomatik fəaliyyəti nəticəsində mümkün olub”,- deyə F.İsmayılzadə vurğulayıb.
Fariz İsmayılzadə bildirib ki, səfər zamanı Böyük Britaniya parlamentinin üzvləri ilə parlamentlərarası əməkdaşlığın perspektivləri, regional və qlobal təhlükəsizlik məsələləri müzakirə olunub.
Səfər çərçivəsində Böyük Britaniyanın aparıcı beyin mərkəzləri ilə də görüşlər baş tutub. “Royal United Services Institute” (RUSI) və “International Institute for Strategic Studies” (IISS) kimi nüfuzlu tədqiqat institutlarında ekspertlərlə fikir mübadiləsi aparılıb, regional təhlükəsizlik, Cənubi Qafqazda gedən proseslər və Azərbaycan–Böyük Britaniya münasibətlərinin inkişaf perspektivləri müzakirə edilib”, – deyə o əlavə edib.
Müəllif haqqında
