Azərbaycan Respublikasının Gənclər Fondunun “Rəqəmsal” mövzulu qrant müsabiqəsi çərçivəsində seçilmiş “Süni intellektlə gücləndirilmiş Elektron Ticarət: 0-dan Yuxarı Səviyyəyə” layihəsi uğurla icra olunub. Layihə çərçivəsində 20 video dərs hazırlanaraq gənclərin elektron ticarət bacarıqlarının inkişafına yönəldilib.
Layihənin resipiyenti Şərifli Yusif Aruzə oğlu (qeydiyyat kodu: 10829.02) olub. Layihənin məqsədi gənclərə və yeni başlayan sahibkarlara elektron ticarətin əsaslarını öyrətmək, süni intellekt texnologiyalarının bu sahədə tətbiq imkanlarını nümayiş etdirməkdir.
Hazırlanan 20 video dərs aşağıdakı mövzuları əhatə edir:
- Elektron ticarətə giriş və ilkin addımlar
- Sosial media reklamlarının planlaşdırılması
- Niş (məhsul istiqaməti) seçimi
- Domen və hosting xidmətlərinin alınması
- Elektron ticarət saytının sıfırdan hazırlanması
- Onlayn ödəniş modullarının quraşdırılması və inteqrasiyası
- SEO optimizasiyası və saytın inkişafı üçün süni intellekt alətlərinin istifadəsi
Layihə nəticəsində iştirakçılar sıfırdan öz elektron ticarət saytlarını qurmaq, onlayn ödəniş sistemlərini tətbiq etmək və saytlarını axtarış sistemləri üçün optimallaşdırmaq bacarıqları əldə edəcəklər.
Layihə rəhbəri Şərifli Yusif Aruzə oğlu bildirib ki, təşəbbüs gənclərin rəqəmsal sahibkarlıq sahəsində bilik və bacarıqlarını artırmaqla yanaşı, ölkəmizdə elektron ticarətin inkişafına da töhfə verəcək:
“Hazırladığımız video dərslər vasitəsilə istənilən gənc sıfırdan öz onlayn biznesini qura biləcək. Süni intellekt alətləri isə bu prosesi daha səmərəli və müasir edir.”
Müəllif haqqında
